تكفى .. خلك هادي وأعصابك بارده ؛ اثناء ” قيادتك لسيارتك ” لا تثيرك ناس بمجرد هفوة عابرة قد تكلفك الشي الكثير .. خله يعدي .. تكفى.

تكفى .. تجاوز ” المقطع الهابط ” ولا تعلق عليه ولا حتى تقرأ محتواه ولو كان ملفت ومستواه لا يليق .. احذفه تكفى.

تكفى .. لا تعور راسك ولا تدوشها في “تصرفات همجية” عند بعض البشر في أي بقعة في العالم .. غير مسارك وابتعد عنه ولا تجادله .. تكفى.

تكفى .. إذا سافرت خارج بلادك تذكر انك تمثلها .. أنك ولدها .. انك صورة جميلة تعكس ملامحها .. احفظها .. كن “قدوة حسنة ” .. تكفى.

تكفى .. ياخوي طالبك إذا جلست في مكان وانت ” غير مرتاح ” ومتضايق من اشخاص حولك .. أطلع فورا .. تكفى.

تكفى .. لا تجادل الجاهل .. ولا تساير الجاد في حديثة ولو كان يقصدك في تلميحاته .. ولا تضحك من غير سبب .. ولا تمازح الغريب .. ولا تنصح من لا تعرفه .. تكفى.

تكفون .. يامسؤولين الشركات والمؤسسات كانت حكومية او خاصة .. مراعاة العمال في هذا الوقت مع إرتفاع حرارة الشمس الشديدة .. ارحموهم وخففوا دوامهم وجهزوا لهم أماكن مكيفه او مظلله مع توفير مياه باردة تنعش يومهم .. تكفون.